“Улаанбаатар Биенналь”-ийн ерөнхий үзэсгэлэнд бүтээлээ ирүүлэхийг урьж байна.

Нийслэлийн Засаг даргын санаачилгаар Нийслэлийн Соёл, урлагийн газар, Монголын Урлагийн Зөвлөл хамтран “Улаанбаатар биенналь”-ийг 2025 оны 06 дугаар сарын 06-20-ны өдрүүдэд зохион байгуулах гэж байна. “Улаанбаатар биенналь”-ийн ерөнхий хөтөлбөр боловсруулагчаар Монголын Урлагийн Зөвлөл ТББ, хамтран зохион байгуулагчаар Засгийн газрын хэрэгжүүлэгч агентлаг соёл, урлагийн газар, “Хөх нар” Монголын орчин үеийн урлагийн төв, Marketainment Mongolia хамтран ажиллана.

Улаанбаатар хот нь 2023 онд ЮНЕСКО-гийн Бүтээлч хотуудын сүлжээнд нэгдэж, дэлхийн 90 гаруй улсын 355 гаруй хотын эгнээнд багтсан нь Монгол улсын соёл, урлагийг дэлхий дахинд сурталчлах, салбарын эзлэх байр суурийг дээшлүүлэхэд ихээхэн түлхэц болж байна. ЮНЕСКО-гийн Бүтээлч хотуудын сүлжээний үйл ажиллагааны 7 төрөлд Гар урлал ба ардын урлаг /Crafts & Folk Art/, Дизайн урлаг /Design/, Кино урлаг /Film/, Хоолны урлаг /Gastronomy/, Уран зохиол /Literature/, Медиа урлаг /Media Arts/, Хөгжмийн урлаг /Music/ багтдаг.

“Улаанбаатар биенналь”-ийн хүрээнд олон улсын ерөнхий болон хамтарсан үзэсгэлэн, гадна талбайн болон урлагийн боловсролын хөтөлбөрүүд, куратор ба уран бүтээлчдийн сургалт, уулзалт, кино үзвэр зэрэг төрөл бүрийн үйл ажиллагаа тус тус зохион байгуулагдана.
Биенналийн ерөнхий үзэсгэлэнгийн куратороор Австрали улсын куратор Тиан Жан уригдан ажиллаж, “Сарны дор, Тэнгэрийн хаяанд” сэдвийн дор олон улсын болон хамтарсан үзэсгэлэнг зохион байгуулна.

Уран бүтээлчид та бүхнийг “Сарны дор, Тэнгэрийн хаяанд” сэдвийн дор уран бүтээлээ туурвиж, биенналийн ерөнхий үзэсгэлэнд оролцохыг урьж байна. Сонгогдсон уран бүтээлчийн бүтээл нь “Улаанбаатар биенналь”-ийн ерөнхий үзэсгэлэнд дэлгэгдэх болно.

Сэдэв: Сарны дор, тэнгэрийн хаяанд
Үзэсгэлэнгийн сэдвийг Монгол яруу найрагчийн ээжээ болон нутгаа магтан дуулсан шүлгээс сэдэвлэн авлаа. Сэдэв нь хязгааргүйн цаадхыг харж, дотоод болон олон улсын уран бүтээлчдийг оршин суугаа газар нутаг, эх орон, гэр орон гэсэн ойлголтыг эргэцүүлэхийг урьж байна. “Сарны дор, тэнгэрийн хаяанд” шүлгийн мөр нь Монгол орны өргөн уудам газар нутгаас урам авч, тэнгэр, газрын хаяа, мөрөөдлийн хөх хязгаарыг дүрслэн буулгажээ. Энэхүү нэр нь уран бүтээлчдийн олон янзын үзэл санаа, харах өнцгийг нэгтгэн уялдуулж, бид өөр өөр хаяаг хардаг ч нэг л сарны дор амьдардаг гэдгийг харуулна. Мөн газар нутаг, эх орон гэх ойлголтын утга уянга, улс төрийн утга санааг агуулж, бүтээлүүдээр дамжуулан өвөг дээдэс, хувь хүний газар нутагтайгаа холбогдох холбоог илэрхийлж, газар эзэмшлийн тэмцэл, уугуул ард түмний хөдөлгөөнийг анхаарлын төвд авчирч, соёлын шилжилт, уусан үгүй болж буй талаарх өгүүлэмжийг хөндөх талбар болно. Цаашид байгальд нөлөөлж буй сүйтгэх, бүтээх, сэргээх хүчнүүдийг ил болгоно. Колоничлол, капитализмын нөлөөнд өртсөн өнөөгийн дэлхийд бид дараах асуултыг тавьж байна: Эсэргүүцэл хэрхэн харагддаг вэ? Сүйрэн үгүйрэх ирмэг дээрээс юуг хамгаалж болох вэ? Юуг сэргээж, дахин шинээр бий болгож чадах вэ? Сарны гэрэлд гэрэлтэх тэнгэрийн хаяанд бид юу харж чадах вэ, тийшээ яаж хүрэх вэ?

Уран бүтээлийн төрөл:
Дүрслэх урлаг болон орчин үеийн урлагийн бүх төрлөөр оролцох боломжтой.
– Инстоляци -Өрөг урлаг
– Уран баримал
– Уран зураг
– Барлах урлаг
– Чимэглэх урлаг
– Гар урлал
– Медиа арт
– Видео
– Гэрэл зураг
– Дижитал арт
– Үйлдлийн урлаг ба бусад

Бүтээлийн танилцуулга:
Уран бүтээлчид өөрсдийн танилцуулга намтар, бүтээлийн танилцуулгын хамт 2025 оны 4-р сарын 14-ний дотор https://forms.gle/nsUGaBqahfsAvkcC7 бөглөнө үү.

Сонгон шалгаруулалт:
Үзэсгэлэнд оролцох бүтээлийг ерөнхий куратор болон зохион байгуулагчдын багаас бүрдсэн сонгон шалгаруулах хороо сонгон шалгаруулна.
Дэлгэрэнгүй мэдээллийг www.ulaanbaatarbiennale.mn , МУЗ-ийн www.artscouncil.mn цахим хуудас, Ulaanbaatar Biennale , www.instagram.com/ulaanbaatarbiennale/ сошиал хуудаснаас авах боломжтой.
Холбоо барих: Монголын Урлагийн Зөвлөл ТББ,
И-мэйл: development@artscouncil.mn
утас: 319015, 319017