Улаанбаатар биенналийн ерөнхий үзэсгэлэнгийн куратороор Австрали улсын куратор Тиан Жан уригдан ажиллаж байгааг дуулгахад таатай байна. Тэрээр “Сарны дор, тэнгэрийн хаяанд” сэдвийн дор Улаанбаатар биенналийн ерөнхий үзэсгэлэнг зохион байгуулна.
Тиан Жан бол бие даасан куратор мөн зохиолч ба уран бүтээлдээ хамтын ажиллагаа, нийгмийн оролцоог түлхүү тусгадаг нэгэн. Түүний уран бүтээлийн замнал нь ярилцлага өрнүүлэх, шүүмж бичих, эв санааны нэгдэл, баяр баясгалан дээр тулгуурласан байдгаараа онцлог юм. Тэрээр Парри, Парраматтад байрладаг хамтын ажиллагаатай галерейн үндэслэгч ба Sydney Review of Books, Lumbung Press, Agnes Etherington Art Centre дээр хэвлэгдсэн “Радикал халамжийн манифест ба урлагийн салбарт хэрхэн хүн байх вэ” хэмээх номын зохиогч юм.
Тиан нь үзэсгэлэн, боловсролын хөтөлбөр, урлангаар хангах хөтөлбөр, уншлага, үйл хөдлөлийн үзүүлбэр, дуу болон бичвэр бичих зэрэг олон төрлийн хувилбараар ажилладаг арга барилтай. Түүний кураторласан болон хамтран ажилласан төслүүдээс дурдвал: Documenta Fifteen, Art Gallery of NSW, Sydney Customs House, 4A Centre for Contemporary Asian Art, Utp, Metro Arts болон Judith Wright Centre-д тус тус оролцож байсан туршлагатай. Тэрээр одоогоор Utp-ийн даргаар ажиллаж байгаа бөгөөд өмнө нь Next Wave-ийн уран сайхны удирдлагын бүрэлдэхүүнд ажиллаж байсан туршлагатай.
Тиан Жан нь Баруун Сидней дэх Даруг болон Катмандугийн Нева-Тамсалинд амьдардаг.
