Ахмад өв тээгчдийн мэдлэг, арга ухаан, авьяасыг ирээдүй хойч үед зааж сурган өвлүүлэх, соёлын биет бус өвийг хадгалж хамгаалах зорилгоор өвлөн уламжлагч нарт зориулсан соёлын биет бус өвийн “Өв-Эрдэнэ” театрыг Соёлын Өвийн Үндэсний төвийн шинэ барилга дотор шинээр байгууллаа. “Рио Тинто” ХХК-ийн санхүүжилтээр гэрэл дууны тоног төхөөрөмж, тайзны бүтээц, үзэгчдийн суудлаар тохижуулж, 161 мкв театрыг иж бүрэн тоног төхөөрөмжийн хамт Соёлын өвийн үндэсний төвд хүлээлгэн өгөв. Монгол гэрийн интерьер дизайнтай дугуй театр нь ирээдүйд язгуур урлагийн тоглолт тогтмол зохион байгуулж, өв тээгч ардын авьяастнуудыг дүрс бичлэгээр баримтжуулан, ахмад өв тээгчдийн мэдлэг, арга ухаан, авьяасыг ирээдүй хойч үед зааж сургах, өвлүүлэх шавь сургалт тогтмол зохион байгуулснаар соёлын биет бус өвийг хадгалж хамгаалахад үнэтэй хувь нэмэр оруулах юм.